राहुल भैया सोनवणे यांची काँग्रेस पक्षाच्या बीड जिल्हाध्यक्षपदी फेरनिवड

वैभवशाली महाराष्ट्र न्यूज विशेष

अंबाजोगाई प्रतिनिधी/दत्तात्रय जाधव

राष्ट्रीय काँग्रेस पक्षाच्या बीड जिल्हाध्यक्षपदी पुन्हा एकदा राहुल सोनवणे यांची फेरनिवड करण्यात आली आहे. काँग्रेस पक्षाचे राष्ट्रीय सरचिटणीस के. सी. वेणुगोपाल यांनी नियुक्तीचे अधिकृत पत्र जारी केले आहे. या फेरनिवडीमुळे बीड जिल्ह्यातील काँग्रेस कार्यकर्त्यांमध्ये प्रचंड उत्साहाचे वातावरण निर्माण झाले असून राजकीय आणि सामाजिक स्तरातून त्यांच्यावर अभिनंदनाचा वर्षाव होत आहे.

खा. रजनीताई पाटील घराण्याशी एकनिष्ठ

राहुल भैया सोनवणे हे राज्यसभेच्या खासदार रजनीताई पाटील यांचे खंदे आणि कट्टर समर्थक म्हणून ओळखले जातात. पाटील घराण्याशी असलेल्या त्यांच्या दीर्घकालीन एकनिष्ठेची, पक्षाप्रती असलेल्या प्रामाणिक कार्याची आणि कुशल संघटन कौशल्याची दखल घेत पक्षश्रेष्ठींनी पुन्हा एकदा त्यांच्या खांद्यावर जिल्हाध्यक्षपदाची महत्त्वाची धुरा सोपवली आहे.

जन आंदोलनातील सक्रिय सहभाग आणि सर्वसमावेशक नेतृत्व

गेल्या कार्यकाळात राहुल भैया यांनी जिल्ह्यात काँग्रेस संघटना तळागाळापर्यंत मजबूत करण्यासाठी मोठे प्रयत्न केले. मराठा आरक्षण आंदोलन, देशातील वाढती महागाई आणि शेतकऱ्यांच्या विविध ज्वलंत प्रश्नांवर त्यांनी नेहमीच रस्त्यावर उतरून आक्रमक संघर्ष केला आहे. ओबीसी समाजातील लहान-मोठ्या सर्व जाती-जमातींमधील लोकांना एकत्र घेऊन चालण्याची त्यांची हातोटी जिल्ह्यात सर्वपरिचित आहे.

गंगा माऊली शुगरच्या माध्यमातून शेतकऱ्यांचा विकास

केवळ राजकारणच नव्हे तर सहकार क्षेत्रातही त्यांनी आपल्या कार्यकर्तृत्वाचा ठसा उमटवला आहे. केज तालुक्यातील उमरी येथील गंगा माऊली शुगरच्या माध्यमातून त्यांनी युसुफवडगाव सर्कलसह परिसरातील ऊस उत्पादक शेतकऱ्यांना वेळोवेळी योग्य भाव देऊन आर्थिक न्याय मिळवून दिला. त्यांच्या या शेतकरीभिमुख धोरणामुळे परिसरात एक प्रकारे हरितक्रांती आकारास आली असून ते शेतकऱ्यांचे हक्काचे कैवारी बनले आहेत.

राहुल सोनवणे यांची प्रतिक्रिया

_“पक्षश्रेष्ठींनी आणि खासदार रजनीताई पाटील यांनी माझ्यावर जो विश्वास दाखवला आहे त्याला तडा जाऊ न देता जिल्ह्यात काँग्रेस पक्ष अधिक मजबूत करण्यासाठी आणि सर्वसामान्य, गरीब व शेतकऱ्यांचे प्रश्न सोडवण्यासाठी मी कटिबद्ध राहीन.”_

राहुल भैया सोनवणे, नवनियुक्त जिल्हाध्यक्ष, बीड जिल्हा काँग्रेस

राहुल सोनवणे यांच्या फेरनिवडीमुळे बीड जिल्ह्यातील आगामी राजकीय समीकरणांना नवी दिशा मिळणार आहे. त्यांच्या निवडीचे राजकीय, सामाजिक आणि सहकार क्षेत्रातून जोरदार स्वागत केले जात आहे.